Resep: Brijani

kos


Hier’s Huisgenoot se kombuisassistent, Priscilla Pietersen, se lekker familieresep.

Genoeg vir 4-6 mense
Bereiding: 15 minute
Staantyd: 20 minute
Gaarmaaktyd: 30-40 minute

MARINADE
5 ml (1 t) brijani-heelspeserymengsel
15 ml (1 e) brijani-masala
10 ml (2 t) garam masala
5 ml (1 t) droë brandrissies, gekap
100 ml natuurlike jogurt

HOENDER
8 hoenderporsies
sout na smaak
30 ml (2 e) olyfolie
1 ui, fyn gekap
3 knoffelhuisies, fyn gekap
15 ml (1 e) gemmerwortel, gerasper
60 ml (¼ k) koljanderblare, gekap
1 groen soetrissie, fyn gekap
1 lourierblaar
160 ml (2/3 k) water
1 stuk heel kaneel

RYS EN LENSIES
500 ml (2 k) gaar basmati-rys
250 (1 k) gaar bruinlensies
30 ml (2 e) botter
3 eiers, hardgekook en in kwarte gesny
vars koljanderblare

MARINADE
Meng al die marinadebestanddele.

HOENDER
Geur die hoenderporsies met sout en giet die marinade oor die hoender. Maak seker die hoender is goed bedek met die marinade en laat staan sowat 20 minute. Verhit die olie in ’n groot kastrol en braai die ui, knoffel, gemmer, koljanderblare, soetrissie en lourierblaar sowat 5 minute. Skep die uiemengsel uit en giet die water in die pot. Bring tot
kookpunt en plaas die hoender met die marinade en kaneelstok in die water. Bedek, verlaag die hitte en laat prut sowat 30 minute.

RYS EN LENSIES
Skep die uiemengsel, rys en lensies by die hoender in die pot, meng goed en stip met botter. Plaas die deksel op
en laat stoom sowat 10 minute. Sit voor saam met hardgekookte eiers.